المنشور

أنا بـس بحـريني

يُقولون أنا سنّي
يُقولون أنا شِيعي
غَلطَانينْ
أنا بَسِ بَحريني
أنا إنسانْ
أنا رُوحي البَحرينْ
رُوحي في سِمَاها دَوم
مَا تغيب عَنها لو لَحظةْ
أنا قَلبي وِتَر هَا الأرضْ
أنا عَاشِق لهذي الأرضْ
هَذي ارضي … هَذي أرضكْ
هَذي حلمي … هَذي حلمكْ
هَذي البحرينْ
قَلب واحدْ
بَحر واحدْ
والبَحرْ مَا ينِقسم نُصينْ
 
***
 
هذي أجمَلِ الأوطانْ
فيها كِلنا تربّينا
تِعايشنا فرحْ وأحزانْ
والحبْ دايم غِنوتنا
تَعالوا نسألِ الأشْجارْ
تَعالوا نِسألِ الأقمارْ
تَحَتها يَاما تِسَامرنا
تِعَانقنا
تِشَاركنا
تَعال في حضني يَا شيعي
تَعال في حضني يا سني
تَعالوا نِزرعِ الآمالْ
تَعالوا نغني اليامالْ
حَتى تِنتشي هَا الأرضْ
سِوا نقول:
أنا بس بَحريني
أنت بس بحريني
أنت مو شِيعي او سني
أنت البَحرين
أنا البَحرين
بَلد مَا يِنقسِم نُصين 

عبدالحميــد القائــد
8 مارس 2011